“Malayo man sa Pilipinas ay nakatuon pa rin ang isipan ni Bong-Bong na pagsilbihan ang kanyang lupang sinilangan. Pinagpatuloy niya ang kanyang pag-aaral at pinaghusay niya ang kanyang kakayahan habang pinapangarap niyang muling makauwi sa Pilipinas sa lalong madaling panahon.”

BAGO KO simulan ang pitak na ito, gusto ko munang magkaroon ng disclaimer. The following article below is not a “paid article”. Nakatuwaan lang. Bakit parang defensive ka? Well, para lang maliwanag. Kasi noong Biyernes. pinahanga ako sa press con at sa galing sumagot nitong si Ferdinand “Bong-Bong” Marcos Jr.

Eto na… Sa loob ng 17 taong paglilingkod-bayan, si Ferdinand “Bong-Bong” Marcos Jr. ay nakapagtala na ng mga natatanging karanasan bilang isang mambabatas, opisyal ng pamahalaan, administrador. Ito ay nangyari malayo sa kisap ng kamera pero malapit sa puso ng balana sa rehiyon ng Ilocandia.

Maagang nasabak si Bong-Bong sa hamon ng serbisyo publiko dahil nasaksihan niya kung paano naging deboto ang kanyang mga magulang sa paglilingkod bayan sa loob ng higit sa dalawang dekada. Sa kanyang murang edad na 23, nahalal siya bilang bise gobernador ng Ilocos Norte.

Ang mga pangyayari pagkatapos ng Edsa Revolution noong 1986 ay pumuwersa sa mga Marcoses na iwan ang bansa. Malayo man sa Pilipinas ay nakatuon pa rin ang isipan ni Bong-Bong na pagsilbihan ang kanyang lupang sinilangan. Pinagpatuloy niya ang kanyang pag-aaral at pinaghusay niya ang kanyang kakayahan habang pinapangarap niyang muling makauwi sa Pilipinas sa lalong madaling panahon.

Matapang na umuwi si Bong-Bong kahit na malaki ang posibilidad na siya ay arestuhin ng bagong rehimen kaya’t siya ang kauna-unahan sa pamilya na nakabalik sa bansa noong 1991.

Sa pagtunto niya sa lupain ng Pilipinas ay hindi siya nag-atubili na agad na muling maglingkod sa kanyang mga kababayan na una niyang pinagsilbihan. Kaya sa ganoon ding taon, siya ay nahalal sa Kongreso bilang Kinatawan ng Segunda Distrito ng lalawigan ng Ilocos Norte.

Ang ilan sa mga markadong batas na kanyang inakda ay ang pagtatayo ng Philippine Youth Commission. Naging kasangkapan din siya para isulong ang kapakanan ng mga kooperatiba sa pamamagitan ng paglalaan ng kanyang Countryside Development Fund (CDF) sa pag-oorganisa ng samahan ng mga guro at magsasaka sa kanyang lalawigan.

Noong 1998, si Bong-Bong ay nanalong gobernador ng Ilocos Norte kung saan siya ay nagsilbi ng tatlong magkakasunod na termino. Sa kanyang siyam na taon bilang gobernador, binago niya ang Ilocos Norte tungo sa pagiging First Class na probinsiya. Kanyang ipinakita na ang Ilocos Norte ay destinasyong pangturista  dahil sa likas nitong kagandahan at kahusayan sa pangkulturang turismo. Sa kanyang liderato, naging kauna-unahan ang Ilocos Norte sa paggamit ng wind power technology na nagsilbing alternatibong pinagmumulan ng pangangailangan sa enerhiya ng kanyang lalawigan at mga kalapit bayan.

Noong 2007, siya ay nahalal muli bilang Kinatawan ng Kongreso kung saan nagsilbi siya bilang Deputy Minority Leader. Sa panahon ng kanyang termino, ang isa sa mga mahahalagang batas na kanyang inakda ay ang Philippine Archipelagic Baselines Law o ang Republic Act No. 9522.

Unang nasilayan ni Bong-Bong ang liwanag noon Setyembre 13, 1957. Siya ang pangalawa sa mga anak ni dating Pangulong Ferdinand Edralin Marcos at dating Congresswoman Imelda Romualdez Marcos. Nag-aral siya ng elementarya sa De La Salle College. Natapos niya ang kanyang pag-aaral sa sekondarya sa Worth School sa England at tinamo niya ang kayang kurso sa Political Science, Philosophy at Economics sa Oxford University noong 1978. Natapos niya ang kanyang Masters sa Business Administration mula sa Wharton School of Business.

Siya ay kasal kay Atty. Louise Araneta at napagkalooban sila ng tatlong anak na lalake.

Iyan ang asikasong Bong-Bong na ginawa niya sa Ilocos. Asikasong itutuloy niya sa buong bansa.

Tutu mo iyan? Iboto me pa, bang mabalu!!!

***

Kung may puna, lumiham at ipadala sa joeley01@yahoo.com o tumawag sa 09063900920.